Эм, эмнэлгийн хэрэгслийн тухай хууль /шинэчилсэн найруулга/-ийн тойм
ЭМ, ЭМНЭЛГИЙН ХЭРЭГСЛИЙН ТУХАЙ ХУУЛЬ /ШИНЭЧИЛСЭН НАЙРУУЛГА/-ийн ТОЙМ
Хүний болон мал эмнэлгийн зориулалттай эм, түүний дотор уламжлалт эм, биобэлдмэл, оношлуур, эмнэлгийн хэрэгсэл, биологийн идэвхт бүтээгдэхүүнийг үйлдвэрлэх, импортлох, экспортлох, хадгалах, худалдах, түгээх, хэрэглэх, хянах үйл ажиллагаатай холбогдсон харилцааг зохицуулж байсан 2010 оны Эм, эмнэлгийн хэрэгслийн тухай хуулийг шинэчлэн найруулж, 2024 оны 06 сарын 05 –ны өдөр Монгол Улсын Их Хурлаас баталлаа.
Уг шинэчилсэн найруулгыг 2024 оны 10 сарын 01 –ний өдрөөс эхлэн дагаж мөрдөж эхэлсэн. Өмнөх хуультай харьцуулбал, тус хууль нь илүү өргөн харилцааг зохицуулж, зарим үйл ажиллагааны хувьд нэмэлт шаардлагуудыг хангасан байхаар зохицуулсан байна.
Шинэ нэр томъёо
Өмнөх хуульд 25 нэр томъёог зохицуулсан байсан бол шинэ хуулиар өмнөх нэр томъёог оруулаад нийт 40 нэр томъёоны тодорхойлолтыг оруулсан байна.
Дурдвал, эмийн худалдааны нэршил, эмийн үйлчлэгч бодис, эмийн олон улсын нэршил, фармаковижиланс, суурь үнэ, эмнэлгийн хэрэглэгдэхүүн, ургамлын гаралтай эм, анхдагч эм /оригинал эм/ зэрэг нэр томъёог шинээр тодорхойлж, энэ талаар зохицуулсан байна.
Тусгай зөвшөөрөл
Өмнөх хуулиар эм, эмнэлгийн хэрэгсэлтэй холбогдох үйл ажиллагаанд 5 төрлийн тусгай зөвшөөрөл /(i) үйлдвэрлэх, (ii) импортлох, (iii) экспортлох, (iv) худалдах, (v) ханган нийлүүлэх/ олгож байсан бол, шинэ хуулиар 3 төрөл болгож, үйлдвэрлэх болон экспортлох зөвшөөрлийг нэгтгэн “үйлдвэрлэх-экспортлох”; импортлох, ханган нийлүүлэх үйл ажиллагаанд “импортлох-ханган нийлүүлэх” зөвшөөрөл олгохоор тус тус зохицуулжээ. Тусгай зөвшөөрлүүд нь дараах бүтээгдэхүүнд хамаарна.
